Mir händ eus scho bitz gfröget, obmer eigentli dä ganz Zält/Mätteli/Camping-Sch… umesuscht uf eusne Rugge umepugglet. Aber nei, lug ä da, si probiereds glich mal no us, di zwei Glämpr! Wenigschtens so s’Zält mal es erschtsmal ufstele und so, luege ob ales da isch unds funktioniert… D’Chuchi ufem Lisi mal in Betrieb neh. Filmabig underem Stärnehimmel… schöni Vögel, aber isch gäng das heds Müsli xeit. Mir zwei händ eus no mit de wilde Rössli vetörlet wo eus sind cho bsueche ide Nacht und händ chli de Mond aghüület. D’Mondfinsternis händs vepennt die zwei Löli’s – isch aso wunderschön xi!
Es isch also mega schön zum fahre da! Chli wi ide Schwiz – eifach wärmer! Chli Kurve, wunderbari Strasse, wenig verchehr. Gravel Roads every once in a while und chli vill Baustele. Also Gält für Strassebau schint ume z’si da – eus sölls rächt si. Chli vo allem ufem Wäg, Wasserfäll, nätti Bekanntschafte und usnahmslos guets Ässe.
Mir gondled vo Bärgzug zu Bärgzug, a Vulkän und Bächli verbi, dur schöni Stedt. Finally rüereds ä mal aständig der Grill ah und butzed es lachhaft günschtigs 1.2kg Entrecôte furt.
De Pino Hachado isch natürli ä zue, aber mir sind glich stolz simmer ane gfahre. Vor allem hämmer ufem wäg no am Christopher chöne hälfe, respektive sim alte gfährt… het auscho vill erläbt. Hendem de Vorderpneu chöne pumpe und de leckendi Tank flicke.
Nach däre stränge zyt gügslets in Pucón vebi… also eigentli meh en nothalt. Will am Lisi häds en Schranz id Saccoche geh ufem weg… die Entschuldigung nämeds gern ah zum chli Pöisele, professionells Schniderhandwärk tätige und mit es par erschte (ächte) Tourischte z’lafere. Mir krieged nach all dem Staub wiedermal e aständigi Wösch und sind ä wieder blitz blank. Luschtigi Unterkünft häds da im ChilliKiwi Hostel… de eint schnarcht ime Hobbithole und de ander ime Büssli… mir findeds ä gmüetli da. Pröschtli!
