Mir händ ja immer sochli glächlet und d‘Stirne grunzlet wenn eus di lokale Zwei- und Vierräder gsteckt händ: wie Wind…? im Momänt windeds ja gar nöd…! ja wie meinsch etz? Mir hend Schräglag bim gradus fahre! Jaja, aber das isch wiiiiiit wäg vo Wind… 🤷♂️
Ganz es gmüetlichs Gärtli hämmer da gha in Gobernador Gregores. Fein und gmüetlich heds chöne si hüt… Mir händsne no xeit dene beide Gwagglichöpf – nämeds doch gmüetlich hüt, ä wäner nüt z‘tue hend… Läsed es Buech, gönd fein go ässe, luged es Filmli, nämeds easy… ÄS WINDET M‘FALL! Aber nei, „cha ja nöd so schlimm si…“ ja klar. Madre Dios…
Sowohl s‘Lisi wien ich münd igestah: dasme 30° Schräglag nach links hät – inere RÄCHTSKURVE!!!! – isch aso schono e spezielli Erfahrig. Händ grad echli Öl gschwitzt. Poah. Heftig.
Etz stömmer da im „Windschatte“ in Las Horquetas, es Refugio, gnau wäg so Täg wahrschinli. Rustikal und di beide Gwagglis chöndsech es Matrimonial teile. Händs vedient die Pföschte.
Kän Meter me hüt! Wän eine will drufhocke no, dä rüeremeren abe. Chilleds! Früe is Näscht und morn i aller Herrgottsfrüechi los, bevor‘s afangt chutte. Plan? Also – guet Nacht!
Windigi Grüess, Lisi & Emil
P.P.S.: defür simmer dä am morge ganz früe los, lug emal wimer glänzed im Suneufgang! Bitzeli spöter hät de Emil no e chlises Jubiläum gha, ganz schön eitel dä Typ, aber magsem göne (pssst 🤫🤭, Lisi)
