Also mängisch mümmer ja scho es bitzli schmunzle… ganz gmüetlich händs xeit. Ganz gmüetlech faheremer richtig Pehuenche Pass mal go luege – nur Asphalt-Strasse, kä Seich händs xeit… und dänn bügeds mal husch rächts ab. Vill z‘früe… am Afang isch ja no luschtig xi, mal chli Underbodewösch und so, voll de Plausch, sogar euses Greenhorn het Freud gha!
Ja da händs no gstrahlet und glachet, und dänn 5 Minute spöter:
Mir händs dä ufsech beruhe la und hend umkehrt. De Superburgi het eus beid sicher wieder abegfahre wil de Viki s‘Zitterhändli hät gha und 2 Stund spöter simmer wieder uf Asphalt xi richtig El Médano. Id Terme hendses deht nüme gschafft, hend aber privat bim Nicolas im Secundo Piso e Bliibi gfunde und mal so richtig Chilenisch gässe bide Señora Isabel deheime (zmorge dä grad äno wos die früsch bachne Brötli gschmöckt händ)
Chli an Paso Pehuenche go gwaggle und mit de PDI go gspröchle. Leider bad news für eusi zwei „Mirwändetzufargentieneler“. Ales zue, vilech nach und nach ab Dezämber, on verra…
Nachdems sowohl di natürlech Sauna wie au d‘Terme in El Médano verschmäht hend fahreds nachme churze Zwüschestop in Linares ad Termas de Chillán und läck die Terme heteds chöne bruche, s‘erschmal d‘Heizjagge teschtet – und ohni Scheiss: Ales zue, weisch mir möched nur Dunschtig bis Sunntig uf. Zum Schüsse!
Zrugg in Las Trancas findeds wenigschtens en heisse Tee für de Burgulon und am spahte Nami chunt dä glich no d‘Sune füre. Unterkunft gits au – zyt für Routeplanig zude Cervezas Artesanal usde Gägend.
Da blibemer doch echli sägedsechs. Chum, mal chli go spaziere, ganz locker, weisch nöd so gäch – s‘nämed easy vom Kü hallt no schüch im Ohr… Drum gwaggleds völlig dilletantisch mal hurti ufen Vulkan ue…. Aber sch… isch das geil xi! Näbem persönliche Vulkanpfupf undeme Rudel Andekondor wo eim en Meter vorde Schnöre dureflüged (wahrschinli hends gwartet bises irgendwo ufme Schnee- oder Gröllfäld en Fehltritt mached) isch d‘Scenery eifach überwältigend. Mir sind eifach nur froh sinds wieder zrugg cho…
Zrugg cho sinds, aber also zimmi ufde Felge, nach bitz über 700 Höhemeter und guet 10km hi und zrugg. Guet mit Pisco Sour Catedral abgschosse und ab id Pfane… wils so schön xi isch, am nögschte Tag doch grad nomal chli go spaziere. Aber gmüetlich, wüki. As Refugium de Shangri La ufe, wone de Ricardo vom Andeclub erklärt winer da wet es Hostel drus mache, en Chnotepunkt schaffe für Usflüg und schlicht sin Läbesabig vebringe. Mega! Het grad de erscht Madbutcher Customs chläber i sis Gäschtealbum übercho! Über Vulkangstei, Senderos mit Usblick ufde Vulkan – eifach gwaltig! Eus händs natürli stahlah die Bride… und dä sinds glich wieder 10km worde, nöd so tamisteil m‘fall – sägeds… Ah ja und eifach wils läss isch sinds dä no ad Kaskade ue. Vollhorschte… hoffe si möged morn Fahre die zwei Sibesieche! Cheers! 🍻
