Sodeli, am Mäntig am 8. Novämber simmer also gstartet… nöd so wimer tänkt händ allerdings. Nachdem eusi beide Vögel ales plant hend, hends am Suntig abig usegfunde das dLandgränzene zu Argentinie vo Chile her zue sind. Ales offe für uf Argentinie ie, Luft, Wasser, Land – ussert: Landgränze AR-CL 🤷♂️ das heisst mir heted scho döfe, aber eusi beide Vögel nöd…
Drum gahts vorerscht mal (planlos) richtig Süde… in Matanzas ässeds öppis und krieged d’Empfehlig in Puertecillo go inezluege. En wunderschöne Surferstrand/ (—> Schrägstrich) Hippiedorf, ab vom Schuss. De Viki het ufem wäg ä s’erschtmal so riiiichtig de Gagg ide Hose woner merkt, ich (Emil) cha zwar mit unbefeschtigte Strasse tiptop umgah – er aber noni! Mit es par guete Schlänker und Rutscher schaffedses aber unbeschadet und es lohntsech:
Denah gahts witer de Küschte entlang und über Hügel richtig Punta de Lobos, Pichilemu. Härzig, aber s’Wätter isch nöd bombe, und eusi zwei Vögel sind eh kabutt. Nachere guete Wösch und Chettepfläg wird aständig pfuuset und witer gahts richtig Pelluhue. Nachme churze Pitstop zum öppis Trinke fahrt allerdings s’Lisi vorus und ich xeh sofort, da isch öppis nöd so im Grüene. Glaub s’Lisi häds äxra gmacht, zum de beide Greenhorns d’Chance geh under “Laborbedingige”, heisst früe am Nami und bi schönem Wätter, d’Chance z’geh en Schluch z’flicke… isch also kei 15 Minute gange, da händs am Papabär aglüte… de het aber glaubs Freud gha – und mir sind z’friede mit de Arbet! All Beteiligte vemuetet, s’Lisi het eifach rasch sini beruhigendi Stimm und ermunterndi Wort wele ghöre 🙂
Denah schaffemers immerhin no uf Concepción, ine Hafe-Lodge wo anschinend nie öpper anechunt… döt erläbed die zwei e zimmi abstrusi Nacht und fahred am nögschte Tag glich witer bis Cobquecura und leged (scho!!!) mal en Pause-Tag i zum mal chli am planlose Plan B z‘schaffe… söleds doch… mir gnüsseds da! Bis gli 😘
