Nachdem de Lappi dä so gäg de Mittag mini Zündcherze wieder aständig inegschrubet het simmer dä glich los und mir hendsi no bis Puerto Varas abetreit… chas nöd andersch säge, aber glaub wäg so Sache machtme so Seich überhaupt: Dä Wäg abe isch dä füdliblutti Wahnsinn!!! Zersch eifach mal links mitem Vulkan Puntiagudo miteme Wulchechrönli, gradus blank de Vulkan Osorno, rächter Hand Vulkan Calbuco, s’ganze am Lago Llanquihue entlang, durde Parque Nacional Vicente Pérez Rosales und linker hand s‘Reserva Nacional Llanquihue. Eifach nur ehrfürchtig. Leider hend die zwei Schnäuz nachde Reps nümso d‘Musse für Pause und Fötele gha – aber eus blibts im Gedächtnis…
Puerto Varas sälber isch etz au nöd sooo spektakulär xi. Natürli ebe, als Usflugsbase hardcore d‘Touristadt. Sautür und s‘Panorama isch ja cool, aber ufde fahrt no e rundi besser xi. Chli en Steiss xi bismer es plätzli gha hend wo fürde Pris ok xi isch. Im erschte B&B Whool & Wood House heds dä pässlet. Het niemer me luscht gha gross was z‘mache, lieber morn früe use und mich und s‘Lisi no bime mech durechecke nach eusne doch scho 3‘500km da und v.a. bevormer ufd Carretera Austral übere gönd.
Dog whisperer… 
Nöd sehr kooperativ xi die beide am abig….
Bemerkung am Rande für die wo‘s Interessiert… dä Honda-Vetragsmech in Puerto Varas hätmer mini Chetti m‘Fall so agspannt:
Da händ sogar eusne beide Amateur gad all Alarmglogge gschäglet – zum Glück. Ja Item, Öl hani brucht und susch isch ä guet xi. Chettespanig korrigiert und ab die Post!
Sind ja früe drah xi und glaubsch nöd: eifach mal ufs gratwohl uf Pargua fahre weisch, nur mal so luege, mit Fähre händs xeit. Voll überrumplet händs eus! Mir sind ja ganz entspannt xi! Fahred deht ane, nöd mal midem Bei abgstande sinds! Eifach diräkt ufd Fähre gfahre die Zäpfe! Mann, schowieder!!!
In Konsequenz simmer defür vorem Mittag scho in Chiloé, respektive bereits in Ancud xi (go Pinguin luege weisch … nöd mal go luege sinds!). Gibne zwar rächt, Ancud heds eus ä nöd atah, husch es Foti und witer richtig Quemchi, Dalcahue bis uf Castro.
In Castro acho hends tänkt chum mer lönds eus guet gah. Juniorsuite gad, gäll. Sauna und so nachdems Terme vepasst und verschmäht hend. Am Spikel une macheds defür zersch mal wieder es Föteli vo Eus:
Ja jedefalls – zersch chli Pisco Sour güügele, chli telefoniere und so isch dä rasch mal 20 ab 7i. Dä findeds use: d‘Sauna macht am halbi 8i zue… ZUE! Läck händ mir glachet, schowieder! 🏍😂
Defür hendsechs bim z‘Nacht nöd Lumpe lah…
Eigentli hämer ja xeit mer lönds si mit dem humane Foodporn da ufem Blog… aber da machemer etz e Usnahm. Ales lokal natürli: Pulpo al PilPil, Choritos al Vapor, Curanto (Chiloé-typisch, Seafood, Fleisch und Veggies, ales mitenand) & Chiloé-Lamm mit Chiloé🥔-🥔stock.
P.S.: de Burgi het gmeint er het mal Luscht uf muschle und het dä is blaue use bstellt… „wer auf die Suche nach einem Tiger geht… 🐯“ – wür de Beni etz säge 😂
Guet usgschlafe, mideme „liechte“ Kater hendsech die beide Pappeheimer xeit „chume mir mached doch mal e Tour de Chiloé“ – sochli go Töffle, nöd? Wie dehei, eifach chli go fahre… hurti gschwind bis Quellón abe und witer, bis as Ändi vode Strass – an Hito Cero am Punta Lapa. Ändli mal chli Sandstrand. Das das Ding grad „renoviert“ wird händs natürli nöd gwüsst…
Schön isch‘s xi… 🎶u när de gliiiich wäääääg wieder zrügg🎶… zum Glück het de easy way nöd klappet, s‘Hotel vo Geschter in Castro isch komplett usbuecht xi. Defür hemmer dä s‘Refugio de Chucao agstüüüret. En sprachlos schöne Ort wo de Felipe vor 6 Jahr uf Brachland het afange ufrume, herrichte und baue. G‘fällt oder gschnitte wird nüt. Baut wird mit Holz vom grundstückeigene indigene Wald – Sache wärded richtig gmacht, mit vill Liebi zum Detail – het eus chli a dehei erinneret…🤗
Euse Schriner isch bim Trekking grad chli is Tröime cho… und dä Platz, ich säg eu 😍
Währends eus dusse veseichet chileds die beide midme Gasöfeli dine und schribed echli Blog… imm‘rhin… am Abig chli Tija (Hottub) und ab id Fädere. Am nögschte morge uf Felipe‘s Empfehlig no ufd Isla Quinchao chli go Sightseeing mache:
… ah da fangts ah 
… und wid‘r s‘Ändi vode Strass
Plan A isch dä xi no überd Fähre husch (again!!!) und in Calbuco en taktische Pfuuus z‘mache. Deht findets aber gad nüt und fahred witer uf Puerto Montt id Hafe-Aglo. Lange Tag xi, sowit simmer bis etz no nie gfahre. Chli Seele baumele lah und früe is Bett.
Defür isch am nögschte Tag nüme sowit xi. Hends gmüetlich gno und hend ä de Zyt gha vom Volcan Osorno & Yate – und vor allem eus zwei no ein zwei Föteli z‘mache. Bis Cochamó hemers gschafft. ✌️-Out, da sind susch all am pfuuse… 😴
