Fairerwis muesme ja säge: si lueged eus ja scho guet die zwei. Die chlini Blessur vom Haas hends grad zum Alass gno sLisi mal wieder richtig under dLupe z’näh. Meischterlich händs am Lisi ihres Röckli mit Baumwulle und Epoxi gflickt, irgendwie e neui Birehalterig in Blinker ine buxiert und sogar no eusi Luftfilter butz. Cheibe guet!
Es isch ersch Mittwuch und ales erledigt… Damits eus nöd langwilig wird und will di beide Vögel eh bitz närvös sind obs mit dere komische Fähre klappet am Samschtig gömmer doch mal chli id nöchi, es Huus witer uf Caleta Tortel. Läck isch das härzig! In 1955 gründet zum Cypresseholz usbüte wos da richlich git. D’Strass dahi gits noni mal 20 Jahr – bis deht ane ales nur mit Böötli und Flugis. Eus zwei lönds zwungenermasse ufem Dorfplatz obe stah – ales isch uf Pföhl baut und mit Holzbrüggli und Stäge mitenand vebunde. Sehr speziell – y muy tranquilo. Chli usruebe…
… und dänn … HEUREKA! Sind ali vier echli närvös xi a dem Samstig… eifach mal anefahre – anen Steg wos nüt hät, voll im Pfäfferland – ohni Billet oder asatzwisi Bestätigung. Nur Hoffnig hämer gha. 3h warte vor Ort und dä zack simmer doch tatsächlich uf die Fähre grollt:
Als erschts simmer natürli wieder zrugg uf Caleta Tortel womer hercho sind… am nögschte Tag am Nami hemer no in Puerto Edén verbi gluegt… irgendwo im nirgendwo… 2 mal ide Wuche chunt e Fähre, susch no hay nada acá … läbe dünds v.a. vom Muschel Vechauf, bitzi Tourismus. Schön isches allemal!
Die ganz Reis isch rächt atemberaubend xi… chli wie ime Flugzüg, eifach gahts 48h am Stuck und d’Vögel chönd umelaufe. Mir sind so richtig azurrt worde. Pappeheimer hend Sitz bezoge und Vollpension gha. Komfort isch mässig – d’Erfahrig gewaltig. Kulisse veschlaht eim zsprach – immerwieder. Erschte Tag strahlend Sune, zweite Tag Wind und Räge… es Schauspiel vode Natur. Ihdrücklich. Erfürchtig. Eifach unberüerte Läbesrum. Protagonischte Flora, Fauna und Elemänt. Wind, Wasser, Sune, Räge. Alles de extremschte elementare Bedingige usgsetzt; es Lexikon wo d’Gschicht vode Ärde über und unter Wasser vezellt. Es Paradies für Geologe, Botaniker, Evolutionsbiologe, Astrologe und Neugierigi… Nöd nur richtig, richtig spannend, dä äno sauschön …
Es bitzeli demüetiger chömemer in Puerto Natales ah… Täg sind lang und de Wind isch omnipresänt. Im Windschatte ade Sune würemer am liebschte di ganz Veschalig ablege – en Meter näbedrah im Schatte im Wind simmer froh das eus die zwei Affe es Fäll händ mitgno.
Da blibemer chli, Emil & Lisi 🤟