Di zwei Motoqueros lönd dank usrichte an Joe und v.a. an Tim wo a däm Zischtig morge no de Usschlag geh händ, dasmer trotzdem deht anefahred. Si händs scho wele uslah die attraktionsschüche Patiperros. Isch bombastisch xi. I bitzi meh als 3 Stund sinds usem Central Camping bis zude Türm ue gwagglet – de Viki hätsechs wiedermal nöd la neh churz füdliblutt go z’Bädele, so als abchüelig nachem ufstig. Superschöni Wanderig und wiedermal perfekts Wätterglück. Mir händ zwei Tag zyt gha zum chli usruebe und de W-Circuit hends usglah wils eus nöd so lang hend wele elei lah – cheibe Flott, oder? 🥰
Wunderbari Stimmig am morge früe (am 5i sinds los) und atemberaubends Panorama – und kä Lüt vor alem. Fasch de ganz Park für sich elei… schono gäbig, sone Pandemie 🙊
Am nögschte Tag dä dur de ganz Nationalpark über Stock und Stei am Salto Grande und sogar am Lago Grey vebi, zrugg zum Don Louis id Cabaña in Puerto Natales go Heiligabig und Wiehnachte Fire. Gmüetlich. En feine Brate mit Härdöpfelstock und Gmüesli für die feine Herre Barön… Sogar es Wiehnachtsbäumli häts gha.
Eus ziehts wieder chli, drum hämersi dä aber am Suntig uf Punta Arenas abegjagd. Läck hät das Wind 🌬😳🌬 eusi Vögel häds fasch usem Sattel glupft und mir händ sälber müse luege dasmer bi dene Böe dSpur hebed. Krass.
Punta Arenas sälber, naja. Erschte Idruck isch lässig xi, mir händ eus wiedermal ufme bewachte Hotelparkplatz chöne niederlah. Und dä machemer wasmer am beschte chönd: Fin del Camino, schowieder
Interessanterwis sind dä die spannende Sache wie Fuerte Bulnes (sFort wos da glandet sind und baut hend) und Puerto Hambre (di erscht Siedlig vor Punta Arenas) und so natürli Mäntig/Zischtig wieder zue xi oder nur per Turitrip accessible… irgendwie wämmer glaub witer. Langsam cheggeds dVögel, wo mir nöd anechönd, gömmer au nöd ane 🤟
Wenigschtens hämmer no vor es par Böötli-Replicas döfe posiere wo historische Wert hend für Punta Arenas. Cooli Family wo da als Hobby/Läbeunterhalt Böötli wie’d Ancud und anderi nahbaut hend und als Freiliechtmuseum betribet. Mir findeds läss!
Windigi Grüess, Emil & Lisi 🌬🏍🤟