Punta Arenas – Ushuaia

So, etz münder lose… eusi Vögel hend ja amel uf de offizielle Gobierno pages vo Chile und Argentinie scho rächt vefolgt was abgaht (lang isch nüt abgange, dä plötzli vill). Was aber überall konstistänt isch xi, isch das San Sebastián nur für Wareverchehr offe isch… aber vo vore…

Wil ebe Punta Arenas nöd sooo’n idruck gmacht het, heds eus uf Tierra del Fuego zoge. Wil San Sebastián zue isch, hämer eus tänkt, chum sochli Porvenir (ä wänn der all säged s’seg 🤢🤮 – de wäg isch ja s’Ziel) oder Timaukel go umegurke und wenigschtens das aluege wome cha uf Tierra del Fuego, chilenischi Site.

Es isch 28. Dezämber, morge früe… PCR no da mache, uf Reserve? Nei isch z’früe, machemer morn, dä chömmer am 31. überd Gränze und ufe richtig El Calafate 👌 “Ales” abcheckt, PCR chasch mache a beidne Ort, all set… wil aber nöd immer ales so isch wie’s im Internet staht unds ned soooo ab vom Wäg isch hämer tänkt mer gügslet doch in Monte Aymond (Paso Integración Austral) hurti ie wis so usxeht, lönd di beide Joggel mal chli fröge. Dä gmüetlich bi Punta Delgado übere und chli Fürliland uschecke – PCR irgendwo (wänsen brucht) und dä hops uf Argentinie. Dasch de plan xi… guet agfange, bizite los und die 200km ad Gränze mit guet Ruggewind zitig gmeischteret, 11i deht, ales guet… no. Und dänn?!

Was macheds die Affe? Träffed zwei Franzose wo vezeled si seged grad vo Ushuaia ue cho – say whaaaat?! Gaht ja gar nöd?! Ja moll scho und en PCR brüchisch ä nöd 🤷‍♂️ da heds dene beidne id chnöde glööötet wie bschüttis Chrüzimääl düre Chäschbertrog! Hirni uf Pausemodus, nüt me gfrögt und los…

I eim Schnutz witeri 230km uf San Sebastian. Wenig lüt, aber ja tatsächlich. Die fahred ie und use 😳 Frontera Chile par verwundereti Blick bim Zoll und mehrfach d’Frag wimer da anecho seged aber irgendwie gids dä glich en Zädel und Stämpfel – listo. Vollgeil! Argentinie! Git e fetti Überraschig, Ushuaia hämer all längscht abgschribe… jubetrubelheiterkeit! – bis Argentinie. S’Lisi stämpfleds tatsächli no ab mitsamt ihrne Füererpapier aber bi mim Vogel frögtme doch mitsim Pass ide Hand no schnäll de Chef und dänn – disculpe, pero esta frontera no puede ser la primera que entran a Argentina… hä was etz? Ja genau… machsch etz s’Chalb? Nei würkli – mit trurige Hundeauge: ihr münd wieder zrugg, meines ärnscht. 🤷‍♂️ Bitte schnäll bi Monte Aymond (ja ich weis, woner grad härchömed) über dGränze und dä chönder wieder cho – isch ja nur en Tag…

🤨💭 ja klar en Tag, PCR, kännsch?!!
🤔💭 nögschmal PCR uf Vorrat gäll ☝️

Wenigschtens winkt eus no dMilitärpolizei womer wieder zrugg fahred… Zum Glück kä troubles ufde Chilenische Site, aber si lached es bitzeli – und es hät e chlini Hostería mit nette Mänsche wome chönd crashe. Mag nüm.

wär cha scho vo sich behaupte, dassi en Fahrer het wo en duregstrichene Ihreisestämpfel im Pass hät? Iiiich, s’Lisi! 🥳

29. Dezämber, au früe am morge. Unterdesse wüssemer das’ uf Tierra del Fuego überall bis 72h cha gah bisme s’PCR Resultat bechunt – mega gäbig wäner zum ihreise nöd elter als 72h döf si, oder?

Jänu, aber en Plan isch gfasst. Zrugg uf Punte Arenas, deht gahts sicher schnäller. Redsalud agloffe: 48h+, ächt etz? Zum Glück isch Chile so guet organisiert… E Stund spöter bi Seremisalud, gratis, zäggbumm, chömeds i 24h über – ouff! Es härzigs Cabaña gids äno mit superschönem Vorgärtli für eus zwei – mässi Eduardo! Richtig wohlig xi, so gfallts eus in Punta Arenas. Retrospektiv: mir glaubed langsam all, das eus Punta Arenas hät zrugg gholt und wele zeige dasmer nöd münd meine si seg kei geili Stadt nur wülme mal es par komischi Bekanntschafte gmacht hät. Rächt häsch Punta Arenas! Richtig coole abig xi! 🤟🥳🥂

Wäg obigem eher gmüetlich ersch am Mittag los stelemer dä fescht, das d’Gränze eh nur 10-16 off het. Am zwei chömeds PCR Resultat über. Chum gmüetli, San Gregorio alaufe, hübsches Hostal, nöch ade Gränze. Mir händ Umschwung, d’Vögel es 4 Zimmer Cabaña, richtig schön da!

Am 9i ad Gränze, zack en Amsle use us Chile. De liecht veständnislose Migrationsdame in Argentinie erkläreds geduldig, das gern würed Ihreis und Usreis glichzitig mache, damids nöd zweimal münd astah. Nachem grosse Ahaaa-Effekt kriegemer zwei Zädel mit de Bitt, erkläreds am Zoll. 4 vedutzti 👀 👀. Ahaaa! Zwei Stämpfel, zack. Kei Stund vegange, glöggli gha.

Es isch 31.12., 10.31 Uhr. Mir sind offiziell z’erschmal z’Argentinie xi. E viertelsekunde zwüsched de beide Stämpfel 😂

Item. De Clou isch etz de, das ebe doch mir Tschuld sind – und nöd dVögel (aso glaubs, so ganz sicher simmer immernoni). Aber will mir in Chile im Böötli acho, nie use sind und San Sebastián nur als Transit Regelig für Argentinie offe isch und ebe nöd Habilitado münd für eus zwei Usreisepapier us Argentinie existiere damitmer deht durechömed. Hämer etz! Fett!

Nurno 519km bis Ushuaia. Mit bitzi Wind. Go. All sind energized will etz das ales so guet klappt hät. Bländendi Luuune, unstoppable. (Meini ärnscht etz! Schwörs✌️)

Fähre Punta Delgada rollemer druf, 30 Sekunde bevor d’Klappe uegaht. Böimig. Churz chli portugieisch rede ufde Fähre mit s’par flotte Höbel vo Brasilie. Freued eus uf Fortaleza!

In Cerro Sombrero schnäll öppis trinke (ja voll, d’COPEC Barkeeper vo dere Strecki käned eus fängs) und hasta San Sebastián. Meh lüt als vorvorgeschter, aber s’gaht. Chile use vil eifacher wi ledschmal. Und Argentinie ine. Vollgeil! Churz nomal ad Bar in Río Grande und über Tolhuin uf Ushuaia. Heftig. 570km a dem Tag. Und nüt me Pampa nach Tolhuin. Gewaltig schöni Bärglandschaft mit Wald, Sune, Räge, Wulche…. Traumhaft. Mir sind glücklich hämers gschaft – ä wän schlussändlich nur mir 4 zäme agstosse hend. Meh bruchts nöd…

Ushuaia 1.1.2022 3am, salud!

Feliz Nuevo año a vos, Emil & Lisi 🥂

One Reply to “Punta Arenas – Ushuaia”

Comments are closed.