Ja ebe… früe los simmer dä vo Las Horquetas, zum dä Wind echli umgah. Isch no lässig sochli früe underwägs si mitem Wüsse dasmes cha gmüetli näh und glich rächt wiit chunt. Aber demit dasmer grad 600km bis uf Gobernador Costa fahred hämmer also scho nöd grächnet… all time Tagesrekord für eus zwei. Aber lässig xi. Vode Pampa is Grüene und hei warm isches worde! Am Morge am 8i tanke in Bajo Caracoles isch no glatt xi. Händ de Fahrer vo es par Brasilianische Zweiradkollege zuegluegt wis usem Hostelfänschter chlätteret – wil no ales zue xi isch 😂 zum Glück isch so nachere Halbstund warte de völlig vepeilt und veschlafnig Tankwart äno usekroche und hät eus en Gutsch igschänkt. Dademit simmer dä bis Perito Moreno cho und händ döt nomal nahgütschlet und die zwei glatte Vögel vo Bajo Caracoles wieder troffe. Same in Río Mayo, womer ä nomal händ wele gütschle – pero no hay nafta, no hoy 🤷♂️ für eus zwei ischs dä sochli ade Gränze xi, die witere 280km nach Gobd. Costa witerzieh mit scho 110km ufem Tacho. Händs dä aber riskiert und de eitli Zapfe hät grad nomal es Rekördli vebuechet – trotz Gägewind satti 313km bis s‘Reservelämpli cho isch! Ha scho tänkt äs seg kabutt! 🤟
Und dä am nögschte Tag… el Bolsooooooooon!!! 🥳🥳
Chli go chile und gmüetlech hämmer tänkt… aber está temporada de vacaciones en Argentina… ewigs und drü Täg bismer en Parkplatz fürd Nacht gfunde händ. Übergangsmässig fürs erschte im „Earthship Patagonia“ – a.k.a. Nazi-Öko-Hippiekommune… nei isch ja no härzig xi – aber weird. Läck weird.
Ab morn dä en überdachte Chiesplatz vorem Cabaña füres par Täg. Herrlich xi zum entspane. Eusi Vögel hämmer da eigentli wele chli in Usgang schicke – stattdesse sinds am 9i is näscht… naja, jedem das Seine 🤷♂️ Schöni Ussicht und fein choche defür. Mal feins Fleisch wo nöd total dure isch wenigschtens – sägeds die feine Herre Barone…
Willkomeni erholig – ä für eus. Dän fangt s‘grosse Warte ah. De überdachti Parkplatz mümmer leider verlah und die allgemeini Parkplatzsuechi/-Uslaschtig wird nöd besser. Temperature sind abegheit, es isch wieder chalt und zwüschezitlich grüslig. Nöd so aamächelig… Nach käne 50km machemer in El Foyel es Päuseli. D‘Herre münd z‘mörgele. Näbedrah heds es Dormi wo frei isch. Es isch 11i am morge, Etappe fertig 😂 schöni Glöön!
Aber fair enough, git ä kän Grund zum pressiere. Isch Mäntig und d‘Pajera vo Lisi ihrem Länkerrüttler chunt ersch am Fritig im 70km entfernte Bariloche ah – best case. Da ischs günschtig und wenigstens troche… die zwei Täg „Raststätteläbe“ wärded i Parkplatzsuechi im ebefalls us allne Näht platzende Bariloche investiert. Irgendeinisch dä mit Erfolg. Heureka. Hend glöggli gha, glaub s‘einzig Hotel mit überhaupt und dä no sore schöne Unterkunft für eus:
Wiedermal chli Stedtli erkunde für die zwei Vögel und vorallem i Burgulon sin Geburi inefihre. Das chönds! Vo Bar zu Bar, mit Ice Bar dezwüschegschalte. Cooli Idee – dä Flo chönts wahrschinli äno in geil mache… Häppy Börsdei Burgi! 🥳🍻
Ihr lached etz, aber mit ihrem 9i is Näscht Rhythmus isch durehebe bis am 12i z‘Nacht aso no sträng xi… 😂
Susch ja, Stedtli halt. Vill trinke, vill ässe für di beide Vögel und bide Klaasje klappet au alles. Fritig Punkt 11i Landig in Bariloche. Etz chömmer z‘5tä chli go blödele. Wätter isch immer no bitz müesahm, aber am Suntig gahts witer. Freued eus all. Isch zwar bequem da ide Garage, aber isch etz dä ä guet. Wiedermal chli underwägs si wämmer – drum simmer ja da!
Hasta pronto, Emil & Lisi 🤟🏍
