Am Suntig simmer dä tasächlich zföifte los… trotz em wächselhafte Wätter. Vo Bariloche richtig Villa Angostura, de Startpunkt vode Ruta Siete Lagos, ales ufe bis San Martin de los Andes. Zauberhafti Strecki! Ä wäns halt de ganz Wäg gschiffet het… und läck hät das Verchehr gha… isch eim fasch chli ufde ⏰
Wenigschtens heds dä nach San Martin langsam aber sicher uftah und ufghört rägne. Höchi Junin de los Andes dä strahlend blaue Himmel und warm. Perfekt zum öppis ässe für eusi Motoqueros – und change of plans. Wils dermasse vill Vechehr hät ufde RN40 und all langsam bitz en lonely wolf Drang händ entscheidemer churzerhand dRuta Provincial 23 diräkt nach Norde z‘neh, söll no schön si i die Richtig und dHoffnig bestaht, dases nöd so vill Lüt het… isch etz nöd ganz so in Erfülig gange, aber sicher weniger un eimal meh herrlichs Panorama, Hügel, Täler, de Río Aluminé – breathtaking!
Breathatking de Wäg uf Aluminé… hät dä allerdings no en „Dämpfer“ gäh… de erscht isch xi, das min Dämpfer nüme dämpft hät. De Viki hätmer nurno Springtüüfeli xeit 😈 – dä Sack! Aber ja gschauklet hani ebe scho… so richtig 🤨 Dichtig vom Stossdämpfer hine flöte gange, nix me mit Dämpfig… de Klaasje isch sz‘Mittag in Junin nöd so becho and bim Lisi isch wiedermal sBier ide Saccoche usgloffe… ah und d‘Spaghetti händ Schimmel gha. Rum und Mate zum z‘Nacht und ab is Zält… usbuecht isch nämli ä da wieder ales xi 🤷♂️
Drum dä halt wieder en change of plan… über siebe Egge hämer de Kontakt vom Fernando Kot in Neuquién übercho wo chön Fäderbei repariere. Zügig xeit ja klar chömed vebi! Ergo simer a Klaasje ihrem zweite Tag wieder 350km richtig Werkstatt uf Neuquién tuubet… 70km Ripio zum Afange bis Zapala mit wunderbarer Landschaft und dä Asphalt 180km gaaaanz fescht graaaaaaduuuuuus…. Sind fasch ipennt Du 😴
Fängs nachde 6e simmer dä bim Fernando acho. Zum Glück häter no grad öpper kännt wo es Cabaña hät umde Egge, listo. Klaasje hät chli chöne go anelige und de Viki mitem Fernando a mir umeschrüble… käni 20min spöter isch das Fäderbei abenand xi…
Am nögschte Tag am 5i bini schowieder fertig xi! Wheeeee! 🥳 nomal e Nacht da und dä ufem 7i ab zrugg in Richtig RN40. Allergins simer dä nöd sowit cho… Sir Burgulon de erschti isch grad nöd so fit. Drum Pause nach knapp 100km in Añilo… chlines Transitstedtli tunkts eim, 3 Tankstele und 20 Hotel – aber schöni Ussicht usem Zimmer:
Nögschte Morge in alter Früschi ab uf Buta Ranquil – hämer tänkt… dRP7 isch dä Ripio worde, zauberhaft, eimal meh…
Absolut geile Ride xi! Richtig de Plausch gha über Sand z‘Flüge! Vooooooolgeil! Bis‘ en chline Chlapf geh hät…
Jänu… us Mangel a Alternative trotzdem vorsichtig witer fahre. Bis Chos Malal, bitz grösser als Buta Ranquil und ä da kännt de Fernando no Lüt. Eis Telefon grad ade Tankstell und 10 Minute spöter holt eus de Horacio (a.k.a. Alamo) ab. Fahrt sälber e Teneré und hät voreme Jahr s‘gliche Malheur gha win ich grad… Fernando häts grichtet. Ja was machemer da? Mal wieder usbaue das Ding…
Per Express schickemers wieder am Fernando und siehe da, käni 12h spöter häters wieder repariert. Sicherig und all Dichtige ersetzt, etz söts hebe hoffemer!
De Kevin vom Goldwing Center Oftringe isch mitlerwiile au uf Trab und luegt, das eus Hyperpro sicherheitshalber en Ersatz/Reserve plus es RepKit uf Córdoba schickt. Hoffemer dasmers nie bruched 🤞
S‘Fäderbei isch mitlerwiile da wieder acho – und di alt „Sicherig“ 😬.
Ibaue und los – langsam hani ächt Bock in Mendoza chli im schatte vo Räbbärge z‘stah – uf das abe sowieso!
Salud! 🍷 & hasta pronto, Emil & Lisi!