Eis vorwäg… mis Fäderbei hebt bis etz. Isch aso viiil agnähmer zum fahre so – vor allem ohni Bibere 😬 richtig Malargüe hämer dä nomal 70km Ripio gha ufde RN40 – womer zum Glück nöd gwüsst händ daser da isch. Grad e gueti Füürprob xi! Drufabe hämer tänkt mir fahred über s‘vill aprisene Valle Grande richtig Mendoza. Lohntsech also!
Wunderschöne Usflug xi! Landschaft bombastisch und Abwächsligsrich. Idrücklech… da machemer doch grad es Asado und trinked chli Wii uf das abe in San Rafael, sägedsech d‘Motoqueros – ah ja, warm ischs etz au!
Ab nach Mendoza etz, tomar algo! 🍷 In Chacras de Coria chömemer vom Juan as putzt und gstrählts, nigelnagelneus Cabaña über, richtig schön und in perfekter Lag für di plante Wiiusflüg vode 3 Vögel… aber s‘erscht wo min Sattelpooper macht, isch mi anelege, so dasmer grad min Guggischild abbricht – huere Aff! Jänu häds dä wieder grichtet, chli steampunky etzt 🤟
Wo das klärt isch xi hämer eus bitz chöne ufdi fuuli hut lege, während d‘Pseudowiikänner sich ufes par schigge Wiigüeter wichtig gmacht händ. Kaiken und Vistalba in Luján de Cuyo midem Velo schins und am nögschte Tag is Valle de Uco midem Bonzebüssli – Gimenez Riili, Corazon del Sol und Bousquet. Di eltischte Räbe vode hütige Produktione da in Maipu und Luján sind knapp 100 jährig, uf Sandbode mit Wasser wo da meh wärt isch wi Gold. In Uco händs ersch vor 20 Jahr agfange, oder no weniger. Spannend und ales starch im Wandel da… Mir zwei händs ruhig gno…
(Ah ja… dä Burgi hät etz ´n Huet, m‘fall… 🤫)
Nachdem all usgnüechteret händ fräsemer über d‘Ande richtig Norde, chönt no schön si! In Uspallata kriegemer de Tip RP149 duruf müs aso mega schön si! Poah und das ischi… ! In Barreal crashe und dä ales witer s149i duruf und übere nach Huaco zum nögschte „hei mir münd etz eifach neumed pfuuse“-Näscht. Ah ja und zwüschedure händs no s‘gfühl gha, s‘Lisi und ich seged noni gnue dräckig – ehrewort! Seifigi Aglägeheit xi du 😬
Über d‘Sierra de la Invernada dä no hurti husch fasch uf 3000m, zwüschedure zimmi Wind ide Cordilleras dank Gwitterwulche und Näbel über de Päss, v.a. am Río Jáchal entlang häts aso zünftig durs Tal zoge… Sind grad chli Erinnerige ufcho… Aso abwächsligsrich isch die Gschicht ä xi – und Landschaftlich öppis vom schönschte sitmer da sind, phänomenal!
Ab zum nögschte Tip: Parque Provincial Ischigualasto. Gfüehrti 40km durs Tal fahre midem eigne Fahrzüg. Heisst mir händ mit döfe. Oberlässig! Känsch Tim und Struppi ufem Mond? Öppe so…
Ja und dän Ändspurt. Trotz 4h durde Ischigualasto gürkle no de ganz Rieme abe bis uf Chepes für e taktischi Pause und am nögschte Tag uf Villa Carlos Paz, deht sötemer neui Finkli übercho, freumi scho! Sind bi Akunft chli meh als 14‘000km. D‘Heidenau sind no picobello für Pavimento, aber Ripio isch langsam chli schmierig 🏍💨😬
S‘ledschde Stuck richtig Córdoba gaht nomal überen Höger, Parque Nacional Quebrada – herrlich.
Etz chillemers mal e Rundi… chline Service, mal wieder RICHTIG wäsche nach dere ver‘Ischigualastoete Ölsauerei und eifach mal chli d‘Speiche hochlagere und zrugglähne. Asado sölls da dä gä und faktisch wartemer ufes Ersatzfäderbei womer dä id Täsche packed ide Hoffnig, dasmers nie bruched… Plan isch dä Ändi Nögschtwuche witer richtig Bolivie, vamos a ver 🤞
Strubi zyt xi by the way zwüschezitlech… drum gids au es strubs Video dezue… 🤡
So long – mer mälded eus dä schomal wieder – Emil & Lisi 🏍😴