Hoi zäme! Ich bims wiedermal – de Emil! Läck hend mir e schöni Garage gha in Pisaq… und ä susch, 3 sehr zfriedni und ruhigi Täg xi… erholig pur, für mechanischi und organischi Lib und Seele…
De Abschied isch eim fasch chli schwär gfalle, so guet hends eus vier glueget. Merci Suzanne & Paul, nos vemos!
Nach Pisaq füehrt eus de Wäg uf Santa Teresa, zimmi abetürlechi Strasse am schluss, glaubs da händs chli es züg mit Ärdrütsche amel und ganze Strasseteil wo wägbräched 😬 zum Glück hämer die par Täg kä Räge gha, oder nöd vill. D‘Wuchene vorher het anschinend chli en andere Wind gwäht…
Item, eus zwei lönds sec am gliche Tag no ide Garaje am Hydroelectrico (wenigschtens bewacht) stah und stiflet devo ufs Zügli richtig Aguas Calientes… wämer no so guet gstimmt wäred xi vo Pisaq wäremer glatt echli Muff xi, ich sägs eu!
Herrlich xehts us, Aguas Calientes und au de Wäg deht ane, magsne ja göne, aber es bitzeli hämmer scho ghofft gha no dasmer mitchönd… isch nüt xi und im Nachinein ä besser so…
Wos am übernögschte Morge wieder zu eus cho sind sind frohgestimmt und pfiifend xi, ächli schnufend nach 2.5 stund abe gwaggle churz nach suneufgang. Aber anschinend händs chline emotionali Achterbahnfahrt dure gmacht…
D‘Story händs eus öppe so vezellt – Szene: Akunft im Hotel (wo‘s ide usbuechte Semana Santa, Ostere no ergatteret hend).
H: „Hi Guys, you go to Machu Picchu tomorrow?“
V: „Of course, how does it work?“
H: „You shoul buy Bus tickets today, it‘s a run and it‘s still quite a walk to get up there by foot!“
V: „Ok…“
Nögschti S‘zene, Busticketschalter, nach 25 Minute astah.
B: „Can I get you passports?“
V: „No, they‘re down at Santa Teresa with the bikes… We‘ve got a foto…“
B: „Sorry, we need them phisical…“
V: „Driver license ok?“
B: „Okok…, when is you entry to Machu Picchu?“
V: „Don‘t have tickets yet…“
B: „ah, then please buy them first and then come back“
V: „🙈“
Viki am Handy zum Billet chaufe für de Nögschti Tag. No hay… übernögschti Tag… no hay… wtf?! Usbuech bis am Mittwuch inere Wuche…! Etz sinds da obe und chönd nöd ufde Machu Picchu? Mir händ fasch chli müse lache! Is Ministerio de Cultura go fröge, nei sorry nix z‘mache. Zum schüsse!
Ab zum Julian, wenigschtens en feine Fruschtznacht mitere feine Fläsche Fruschtwiii… und chli vorhüüüle am Chällner natürli, mimimimimi… de glatt, wart ich känn da eine. Umetelefoniert, zagg, er lueged für eu, warted uf Bscheid, vilech klappts no…
Nögschte morge Nada. Jänu… nomal nahgfrögt, ja chömed am 8i an Plaza, das isch de Jimmy, er lueged für eu! OK…?
J: „Listen guys, they may open the system at noon, we have to wait. But I will get your tickets first thing and then we leave the group and go directly to Machu Picchu, ok?
V: „🤷♂️ …ok…“
4 Stunden später…, ca. 12.30 …
V: „Jimmy, how does it look…???“
J: „ Trouble with the system, it says you already have tickets!?!“
V: „🤷♂️ … ok …?“
J: „Ah wait, just called my friend who was helping me with the tickets, it was him and your tickets were already booked 2 hours ago… but fine, we can go!“
V: „Wheeeeeeee…!
Ja spezielle morge xi, aber:
Stelltsech use de Jimmy isch en richtig geile Siech. Bringt si 2h früener ie als eigentli döfed, kännt de gägewärtig verantwortlichi Hauptarchäolog und het bim füehrende Machu Picchu Archäolog studier und mehrfach bi Freilegige und Instandsetzige mit gschaffet. Unglaublichs Backgroundwüsse und di fasch 4h tour isch de füdliblutti Wahnsinn. Mit über 80% original di beschterhaltni Ruine, vilech halts wils d‘Spanier nie gfunde händ. Zum Glück. De Ort sälber het scho sini eigni Magie, mitem Rio Urubamba unedrah, wit über de Tächer vo allem umgeh vode Schneebedeckte Bärge im Hintergrund und mehrere Quälle und di üblichi crazy Aquäduktwasserversorgig wo eim wüki mängisch Aliens id Gedanke springed… crazy shit und WOW! End of story…
Damit am Lisi und mir nöd langwilig wird händs tänkt chum mer fahred doch obedure chli richtig Ayacucho. Das das wieder (wahrschinli Afänger-) Dschungel isch händs nöd so checkt. Statt i eim Tag uf Ayacucho bruchemer 3, aber läck geil. Nach dem Touri zügs tuds mal wieder richtig guet a ungläubige Gsichter vebi z‘fahre und bim ahalte als erschts z‘ghöre: que hacen por acá?! Nadie viene por acá!
Erschte Stopp in Kiteni, zweite in Kimbiri. Jede Tag machemer max. 150km – i 9h fahre 😂
Me chönt aso ä da anäh si heged echli Problem mit Ärdrütsch und derrumbes… vo 4 Meter höch zügs ufde Strass bis „wo isch‘d Strass“ gits ales. Aber mer chömed überall irgendwie dure und irgendwie hemmers ja ä gsuecht…
Am dritte Tag schaffemers dä irgendwie uf Ayacucho, isch e richtig schöns Stedtli ohni Tourischte hed de Vinc gmeint… machemer doch. Was niemer gwüsst hät, anschinend de zweitwichtigt Walfahrtsort während Semana Santa. Ganz Peru chunt uf Ayacucho cho party mache… lleno, otra vez. Läckbeck. Da mümmer wäg. Mit Glück es weirds chlises „Hotel“ miteme verwirrte Host, früe is näscht, am morge am halbi 6i tschäse Ayacucho, wüki nöd… Ab an Strand!
Aber zersch no über de Abra Apacheta uf 4746m, läck simmer is schwitze cho. Da hät ä ade Gmischistellschrube umetreie nüme vill gnützt… wowsie!
Dur Zuefall buecheds in Paracas (s‘einzig wo no Platz het und ä schweinetür während Ostere) es härzigs Containerhüsli wo „zuefällig“ amene Kitestrand isch… herrlich seitsech de Vik. Fabuloso, 3 Täg Kite, susch chli hänge, s‘beschte us de Sach mache. Mir hend wider en sandige aber schöne Parplatz und da chli usserhalb ischs gar nöd soooo schlimm mit de Touris. Sogar de Sir Burgulon chasech erwärme für die par Täg. Machemer, aber dä fahremer wiedermal chli, d‘Strass rüeft.
Freued eus und bis dehte gnüssemers da:
S‘erschmal so richtig am Strand m‘Fall!
En liebe Gruess vo allne drü und hebeds guet, Emil! 🏍🤟