Tropfnass und duregfrohre simmer in Abancay acho. Ufem Wäg hämmer no de Antonio troffe, au en Motoquero – vo Cusco. Het scho deht all Hebel in Bewegig afah setze, dasmer eusi Simmering in Cusco chönd Wächsle. Ganzganzganz en guete Mänsch. In Abancay husch was ässe und früe use. Am Morge am 7i über de Cordillera, wowsie!
Churz überleit und huschhusch dur Cusco dure, witer Richtig Vinicunca, zude Rainbow Mountains. Glaubsch nöd, sind mueterseele elei xi… 100 Ständ, aber kän Mänsch… midem wächselhafte Wätter und agschlagne Gable simmer dä aber halt nöd ganz ufegfahre. Aber läck das Tal… Atemberaubend, da chöntme chli sii…
In Cusipata findemer zum Glück en Parkplatz zmitz im Comedor bi zwei gaaaanz liebe Mänsche. Vor Corona seged da umdi 2500 Lüt uf Vinicunca – pro Tag! Ja, etz isch gar nüt los. Guet schlöfele, e Caldo zum zMorge und dä huschhusch los gahts mitem Ruin Run!
Agfange im nöch glägene Pikillacta. Ei riese Stadt mit Aquädukt und alem drum und drah. Vill Restaurationsarbeite und im Büro vode Touristinformation es riiiiiiiese Gürteltier 😳
Nach Pikillacta ufem wäg nach Tipón heds dä chli Radau gha mit Strassesperri nach Cusco. Mir händ aber döfe durefahre, wilmer so lieb blinzlet händ 🤫
Tipón isch gewaltig. E riese Alag – eimal meh – mit Wassermanagment, Fountain und dPräzision vo dere Steiarbet isch schier unglaublech…
Nomal zrugg durd Strassesperri und ales durs Valle Sagrade hindere bis Ollantaytambo. En Regierigssitz meh vode Inkas, mega Steil und de leider teilweise zerstörti Templo del Sol bestaht us riiiiiiesechempe!!! Kei Ahnig wis die deht ue bracht hend… boah eh ächt? Wieso isch ales so höch und so steil? Die beide Vögel küched amel wie die hohle wäns zrugg chömed zu eus 😂
Dänn verfahremer eus zimmi… aber luschtig abetürlech ufem wäg zude Salinas de Maras. Chli wie Uyuni, e Salar – nur dämal ime 45° Winkel! Ja was machemer da sägedsech dInkas. Mer baued 3500 Becki, mit gnau de richtige Grössi und gnau em richtige Abfluss, das Salz perfekt usfällt und nutzbar gmacht cha wärde… mängisch ächt schier unglaublech…
Isch zwar scho spaht, aber wämer scho da sind… witer uf Moray. Muetmasslich es Agrarlabor vo Präinka und Inka zyt… uf allne Ebene sind di gliche Wurzelresidue gfunde worde. D‘Vemuetig liht nöch, das da glueget händ, weli Sortene genau uf welere Höchi am beschte wachst. Ohne Worte… und d‘Abigstimmig über und ide Ande haut eim eifach Weg…
Z‘Abig am 7i trudlemer in Cusco ih… Peruaner halteds amel nöd für nötig s‘Abbländliecht izstele wän öpper entgäge chunt… nur sone Bemerkig am Rande… s‘Hostal Casa Grande Colinial isch es Motoquero Hostal wo eus de Antonio organisiert het und de Parkplatz im Innehof isch de Hammer. Normalerwis seg da ales vole Töff… naja, Corona eimal meh. Emil und ich sind elei… glich isch in Cusco touristisch e bitz meh los.
De Emil liferemer am nögschte Morge am 9i bim einzige Mänsch ab wo no Simmering het zum dGable revidiere. Krass. Dänn z‘Mörgele und e Stadttour midem Antonio. Di ganz Altstadt isch uf Ruine ufbaut und wäme weis wo luege (merci Antonio) xeht me sache… zwölfwinkligi Stei und Schlange ighaue… spezielli Hüser und Musee. Information overload, aber sehrsehr idrücklich xi!
Am Nami, nachdem de Burgulon no es Meersäuli vetruckt het macheds es Vedauigsspaziergängli an Sacsayhuamán ue. Witeri Regierigs- und Zeremonie-Stätte überde Dächer vo Cusco mit de gröschte Möcke Stei wos bis etz xeh hend. Und alles so genau veschachtlet und bearbeitet. Komplett Ärdbebe sicher dank de richtige Winkel. Völlig surreal und wies das gmacht hend gits Theorie, aber wüsse tuts eigentli niemer… no hurti Q‘enqo ufem Heiwäg und dä gömmer de Emil go hole und bringed mich, dasi dä am Mittwuch au parat bi fürd Witerfahrt.
Mit e bitzeli Vespötig klappet das. Au ich bi listo mit neue Simmering. Ab uf Pisaq sägemer da. Deht chömmer chli veschnufe bevors witergaht richtig Machu Picchu 😂
Au da löndssech e usgedehnti Wanderig zum Parque Arqueologico nöd neh…
Maches churz. Es isch GEWALTIG da – in Pisaq machemer es Päuseli und lönds chli uf eus würke…
Liebs Grüessli au vom Emil und hebed eu Sorg! Bussi Lisi 😘