Liebi Lüt… uf Santa Cruz wäremer also nöd ie wänn de Viki nöd de Alejandro kännt het… dank em Alejandro allerdings mus de Ufenthalt für eusi Motoqueros zimmi glatt xi si. Eimal sinds emel am Morge am 8i a eus vebi is Bettli gschliche. Rächti Haudäge 😂 …
Item, für eus isch eher unspannend xi, usser dasmer de Reserve-Rear-Shock händ chöne flicke – am erschte abig. Listo. Us Santa Cruz hämer dä dRoute eher unkonventionell plant, mal chli richtig Selva (Rägewald) uf Trinidad und durs Departemento Bení vo Norde här nach La Paz… definitiv anders…
Guet 700km i eim Schnuz uf Trinidad, entgäge allne Erwartige piiiiicobello Strasse, unglaublech! Nigelnagelneu Pavimento, wiedermal… glich spaht acho, gnächtiget und en Trip in Jungle organisiert. Nögschte Tag in CHUCHINI Amazone Wildlife Eco – Resort. CHUCHINI ide lokale sprach heisst so vill wie’s „Huus oder Dehei vom Puma“, zurächt… Seeeeehr empfehlenswärt säged eusi Fleischseck – obwohl, ja, läääääck sinds gfrässe worde im capital de los mosquitos 🦟 schwül und füecht und heiss und Mosquitos, 3 Täg lang „mimimimimi“ hämer müse lose. Aber d‘Erfahrig wärt. Die ganz Umgäbig nöd nur so richtig unverfälschte Jungle, sondern ä da wieder Zitzüge vonere Hochkultur. S’Gebiet wo di ganz Alag druf Baut isch und einigi Hektare rundume isch im Familiebsitz ide zweite Generation. Überall findtme Relikt. Di zahlriche Erhöhige (s.d. ebe ä i Jahr mit viiiil Wasser nöd ales überschwämt wird) isch vo Mänschehand erschaffe, mit intelligänte Bewässerigssystem und alem Mögliche – 10-15’000 Jahr BC! Mehreri Hiwis vo Fundgägeständ düted druf hi dassech ume Hochkultur mit asiatische Wurzle ghandlet hät. Susch vill unerwarteds wie Alligator streichle, pinki Flussdelphin (ja wüki, di einzige Süesswasserdelphin wo‘s git, sind bläulich wäns relaxed sind und wärded Rosa wäns münd schaffe oder under Stress), bädele ide gstafflete Amazonaszueläufer Ibára und Mamore wome am Abig vorher no het Kaimane xeh dureschwüme… jungle trip… Ales was dezue ghört. Und das mit richtig guet background infos und know how! Seriously – wäner ide nöchi vo Trinidad sind, gönd deht ane! (Und nämed Muggespray mit – vill…). Aber d‘Stimig und ales drumume, unvergässlech!
Nach drü Täg piiigse lah auffi richtig La Paz. DStrasse sind da wüki nüme bländend (aber im Bau) und dFährene sind abetürlich und nöd uf schwäri Töff usgleit 😂
Bis San Borja hämers gschafft. Bombe Wätter, ab und zue chli en Rägesprutz, aber nüt heftigs, sowit so guet. Dä „nu churz es Redbull trinke, weisch…“ und BÄM:
Sälbscht am nögschte Tag hämer fasch ade gliche Stell bide fründliche Militärkontrolle vorem Hüüüsli no 2h gwartet, damit d‘Sune nochli cha udfe Matsch bräne und es par Laschtwäge Glägeheit hend ebensolche vor eus nochli platt ztrucke. Krass – schlifrigi 50km bis Yucumo… und das mit eusne (bereits) abegfahrene Pneus… Aso mer sind ä nacher nochli dräckig worde, ich vor allem…
Ab Yucumo isch dä wieder Pavimento xi, löchrige, ufpasse wie häftlimacher aber gewaaaaltigi Landschaft und ussicht ufem Wäg nach Caranavi. Hät Spass gmacht!
Vo Caranavi dä schön igfahre bis Coroico fürde ominösi Camino de los muertes… deathroad, Todesstrass 👻☠️. Die alti Vebindigsstrass uf La Paz. Jaaa… was sölemer säge, das isch s‘krassischte xi womer deht gmacht händ:
200m witer häds gheisse zu wegen geschlossen. Gröllfälder, grossi piedras. Z‘Fuess, midem Velo ok, aber mit Töff und Auto no way… simmer halt über die neu Strass uf La Paz. Was ä immerno rächt imposant isch xi. Musmesech bewusst si: in Caranavi simmer uf 700m.ü.M. gstartet und ä da Afangs Deathroad sinds ca. 900m.ü.M. und gueti 30 Grad im Schatte xi. Dä hopp de Bäse richtig La Paz und bi 2‘500m.ü.M. – wohlgemerkt , 30 Minute spöter – fangts a seiche wie Sau, bis La Paz, chli Iiisräge dä no so uf 4‘600m.ü.M. über de Pass. Boah isch das chalt xi. 🥶
La Paz sälber spannend. Chöntme chli zyt vebringe, weme nöd de Grossstadtkoller hetti…
Drum par Sache aluege, schowieder neui Reife ufzie und witer gahts. Wiler halt vor 39.5 Jahr muetmasslich schomal deht xi isch, wet de Viki aber no uf de Chacaltaya ufe. Easy, ma hurti chli id Höchi, oder? Ähm ja… me händ aso chli zitteret ufem wäg, aber nöd wäg de Chelti. Ales guet, sind wieder heil abecho. Ja, aber isch euse ganz eignig camino de los muertes xi. Heilige Bäse…😲 aber hätsech glohnt, idrücklich, so bis uf über 5‘250 Meter ue…
Nachde ledsche Nacht in El Alto use usde grosse Stadt richtig Tiahuanco, nomal chli prä-Inka Ruine. Allerdings hends eus gwarnt s‘heg Bloqeos, kei Zuegang zum Stedtli und richtig Desaguadero… glich probiert, wie immer und siehe da. E 15km langi Laschtwage Kolone. Si heted gern 4 Spurig Pavimento aber d‘Regierig wets nöd mache. Drum blockieremer mal d‘Hauptachse zu Peru. Chli es gfriimel xi zum durecho, sälbscht midem Töff und guet über Wald-und-Wiese-Umwägli, aber die Sach unterstützemer, suerte! In Tiahanaco acho, imposant eimal meh und das Wätter, läcke beck. Zwei Gwitter am Tindere! Zersch chli hin und här Blitz-und-Donner-telefoniere und dä „chum doch, du gfallschmer!“ träffedsechs ide Mitti und lönd d‘Sau use. So ghaglet häds, dasme ufen Meter Distanz käs Wort me hät vestande.
Tiahianaco Ruine au da wieder über mehreri Epoche, wie Samaipata usw. DMonolite sälber datiered wit vor Inkas zrugg, di übliche 10-15‘000 Jahr BC. Vo anderne Völker dä usbaut und vode Inkas ä witer gnutzt stellt Tiahuanaco all 3 Ebene dar. Himmel (Kondor) – Erde (Puma) und dUnterwält, sOskure (Schlange). Entsprächend 3 clever usgleiti Tämpel/Ritual Alage uf 3 Ebene zum de entsprächende Aspäkt Rächnig träge. Natürli mit allne astrologische, astronomische und kalendarische Aspäkt ibaut. Scho krass…
Am morge nachem grosse Sturm tifigtifig richtig Copacabana. Ales hineume wägde Bloqeo, zum Glück simmer durecho 😬
Nomal chline grösseri aber ä wieder luschtigi „Rückwärtsschiebfähre“…
Und dänn Copacabana. Schöne Usblick und s‘Ändi vom Wäg am Feschtland isch de nördlichschti Punkt womer in Bolivie erreiched (usser de Vik, dä macht no es Usflügli ufd Isla del Sol).
Da heissts fürdi beide Länkerrüttler nochli admin mache, mini Reservetankhalterig schweisse, chli umetingle und dä de Übertritt nach Peru organisiere. Hoffemer s‘Bescht!
Wunderschöne Abschluss in Bolivie, tolls Land, tolli Lüt, villzvill ässe und leider chli es Abfallproblem. Hoffed ihr krieged das in Griff – es stinkt wüki und xeht nöd schön us i dene zauberhafte Landschafte!
Viva el Chaco, gracias a todos y suerte! Mär ghöred eus,
Emil & Lisi 🏍🤟