Also eis vorwäg, Bolivie – eimal meh – wowsie… 🥰 de Emil und ich chömed zwar öppedie chli is schnüferle wägde Höchi, aber läck die Landschafte… fürd Lüt isch zuvorkommend und hilfsbereit stark untertriebe. Hend chli öppis erläbt die ledschde Täg und sind guet vorwärts cho. Di meischte Strasse sind bombastisch… nur midem Benzin ischs sochline Sach, aber bis etz hemmer no immer übercho – solang eusi Vögel bereit sind ab und zue de drüfachi Pris z‘zahle 😂
In La Quiaca – Villazón hemmer öppe 4 Stündli brucht zum überecho. Aber eigentli nur wil eine mit sim Wohnmobil vor eus fasch 2h irgendwas küechlet het. Vierreder halt 🚐🤷♂️
Das mir zwei eus glich nochli händ chöne bewege simmer wenigschtens no bis Tupiza gfrääset, deht öppis feins gässe, mal anen Bankomat und e richtig günschtigi Garage übercho. Malerisches Stedtli, vole Tukuk!
Am nögschte Morge ab is Casa Del Sal in Uyuni, wo eus de Alejandro empfohle het… en Palascht komplett us Salzblöck baut. Chli tüürer, aber immerno günschtig, die Garage. Ah ja, mer sind ja in Tilcara scho uf 3‘200m xi – ufem Wäg etz hämmer mal 4tuusiger Luft döfe schnuppere… händ aso bitz am Schrübli müse drähie…
Ja und dänn simmer chli salzig worde… luschtigi Vögel. Wenigschtens sinds nöd gad ganz dur de 20cm Wasser-Salz-Madsch mit eus gfahre, nur sones bitzeli zum Föteli mache. Schono läs xi und nacher ä propper gwäsche, merci!
Händ grad chli Sune übercho ide Salzwüeschti… schono Idrücklich. En See mit sore ticke Salzchruschte dasme cha drüber fräse und a gwüsse Ort schnüferlets nochli us Löcher use – blöterlet richtig. Faszinierend.
Nachdems sich en hübsche Sunestich und salzigi Stifel igfange händ simer dä no bim Cemeterio de Trenes go ieluege. Anschinend händs vode Ängländer e ganzes Arsenal bstellt, gliferet becho mit alem drum und drah… ja und dän ischne ufgfale, das Dampflocke uf 4000m.ü.M. e nicht zu vernachlässigends Problem darsteled. Drum stönds etz immer no deht, nie brucht und büted e hübschi Kulisse für tummi Föteli 😂
Ufem Wäg richtig Potosí hämer äno hurti in Pulacayo inegügslet, e alti Mine, wosech ächli abote het zum Fötele… hihi, Löckfüerer Burgi isch Programm xi!
Dä Wäg uf Potosí hädsech so zwüsche 3‘500 und 4‘300 Meter abgspillt, jedesmal wän über de Höger cho bisch es Tal wo wieder andersch hät usxeh. Sind bitzi kroche, wie xeit, aber guet xi so- meh Zyt zum luege…
In Potosí hämer dä ganz en glatte Parkplatz gfunde – Im Hotel drin!
Zyt gha zums Stedtli chli go aluege hämer au – und chli go Caipi a la Jarra güügele schinbar… cheibe guet!
Am nögschte Morge händs eus churz packt und sind abzischt is Casa de la Moneda. Bis 1930 oder so händs döte Plata (Silber) gmacht wo usem Potosí-Bärg usechunt (immerno!). Me munklet, das bis hüt sovill Silber usem Bärg isch cho, dasme vo Potosí bis uf Madrid het chöne e Brugg baue… bitz spöter het öpper agfüegt, dasme usde Gebeine vo dene wo bim Abbau drufgange sind no e Zweiti chönt baue… hauptsächlich Sklave, Nativos und sogar us Afrika importiert teilwies. Scho bitz bedänklich…
Bienvenido a Sucre! Au es härzigs Hostel und e üsserscht gmüetlichi Stadt- d‘Hauptstadt schinbar, hämer nöd gwüsst. Nur de Regierigssitz isch in La Paz. Jede Tag lehrtme öppis….
In Sucre hämer dä festgstellt das etz mich de gemeini Fäderbeizwärg vewütscht hät – adieu Öl und Dämpfig. Zum Glück hämer ja etz no es dritts! Zagg inebaut und am morge nochli in Parque Creático, wo e Zemäntbude die gröschti Sammlig vo Dinofuessabdrück bim Abbau entdeckt het. Hüt en Park wome cha besichtige, mitunter mit ganz vill Replicas in Ächtgrössi – chli Galerie für de Luan a dere Stell, mer bitted um Verständnis!
Bis San Isidro am nögschte Tag sind dStrasse eifach bländend xi. Etz gits sochli Abwächslig dri. S7i nach Samaipata isch sochli guete, beschissne Asphalt und gueti Tierra – mir chömed guet vorwärts, dütlech besser als d‘4 Reder. Gmüetlichi Nacht ire oberhärzige Posada und…
… ab go s‘Fuerte Samaipata aluege. En chlinere Sandsteimocke (400 x 80 m) wos no wiiiiiiiiit vorde Inkas da als Kultstätte hend useghaue. Leider ohni schriftlichi Aleitig. Gnau nach West-Ost usgrichtet und faszinierender Wiis geographisch i eire Linie mit alne witere Kultstätte in Peru, Ecuador und so witer. Spöter dä scho au vode Inka‘s und so gnutzt, datiert d‘Erschaffig aber über es Jahrtuuusig vor de Inkas. Heftig oder?
Di räschtliche 100km nach Santa Cruz ziehndsech bitz. Vill vo dene (unakündigte und vollveblödete) Bode-Bumpers, Vechehr und s‘isch aso heiss… no uf 500m.ü.M. – und füecht. En Art.
En herzliche Empfang in Santa Cruz bim Alejandro dehei! Schöne Parkplatz! Churz kümmeredsechs um mich und bringed mis Fäderbeinli id Reparatur, sehr zuvorkommend! Dän gönds wieder go ässe. Pizza zum z‘Nacht, traditionell Santa Cruzisch zum z‘Mittag, Asado zum z‘Nacht und Cerdo al Horno zum z‘Mittag… cheibe Schlemmerei – unglaublech 😳
Mir mached mal es Päuseli – isch ales grichtet, mir sind listo.
Grüessli usem Vorgarte, Lisi & Emil 🏍🤟
Tüdelüüüü 🥳
