Loja – Cuenca – Baños – Quito – Ibarra

Ecuador hämmer ja gwüsst dases chli chliner isch als di andere Länder, aber s‘isch aso scho wüki chli. Und bländendi Strasse, richtig Erholig, mal wieder eifach us Asphalt guet Strecki mache. S‘einzige wo nöd absolut top isch isch s‘Wätter. Vor allem di schön Strecki vo Cuenca über Riobamba nach Baños de Agua Santa hämmer eigentli gar nüt xeh. So bis wüki nüt m‘fall, ha am Emil sis Rückliecht uf 5-10m teilwis nüme xeh – derartige Näbel und Nieselräge bis Räge de ganz Wäg. Aber hä ja, hend dermasse Wätterglück gha bis jetzt, chönd und wänd eus nöd Beklage! Aber vo vore…

Gränzübergang voll gschmeidig, kein PCR nötig, chum Lüt, Migration nachere 4täl Stund dure, lug winer strahlet:

Wägem Emil und mir ischs dä glich chli lenger gange aber Zollbeamte meeega hilfsbereit, het vo eus ales igsammlet, nahgfröget und ales erledigt, so öppe es Halbstündli warte pro Töff. Sind so früe drah xi, dasmer händ tänkt fräsed gad no das Schläufli durab nach Loja, deht ischs s‘Wätter no einigermasse ok xi und vorallem – nachdemmer grad no 2h am Meer entlang dur d‘Wüeschti gfahre sind, e Halbstund spöter so 🤩

Loja empfangt eus mit wenig Verchehr, herzliche Lüt, Räge undeme wunderschöne Stadttor.

De Weg füehrt witer über Cuenca (mega härzigi Stadt und i Sofy‘s Glocal Cuisine wahrschinli s‘beschte Nachtässe wo die zwei ufde ganze Reis bis etz gha hend) , a Riobamba vebi witer nach Baños… Wätter durzoge, aber abxeh vode Näbelgschicht nach Cuenca nöd brutal übel…

Womer dän mal öppis xehnd findemer es xeht also rächt us wie dehei. Grüeni Matte, viel Chüe… nur Vulkän häds no, so als Süpplämon 🌋

In Baños chömemer no troche ah, aber dä lahts mal so richtig aständig abe. Drum rissemer deht kä Bäum us, aber eusi beide Vögel findeds no glatt wenigschtens vorem z‘Nacht no d‘Aldea Magica und de Bosque Encantada go aluege, härzig isches ja… chindschöpf…

Nögschte Morge sölls troche si, drum zitig uf und hopp dä Bäse zude Laguna de Quilotoa, Vulkankratersee, zimmi sexy heds gheisse… bi Akunft gids dä aber Nieselräge, Wulke und Näbel – nix zu sehen, usser die zwei, de Päde und (hihi) nomal es Liisi, wien iiiich – aber mit zwei ii! Ischmer grad d‘Veschalig chli Rot agloffe du ☺️

Die zwei sind aber scho bide (näblige 🤭) Lagune xi am morge, drum zischeds nach es par gmüetleche Bierli am gliche Nami witer. Mir gönd früeh go schlafe und wärded am halbi 7i – s‘erschmal in Ecuador – vode Sune gweckt 🥰☀️ ab ad Lagune, no vorem zMorge!

En strahlend schöne Tag zum hineume über Sigcho nach Quito z‘fahre und chli go Bauwerk aluege

Nacheme guete Stadtbummel inklusive Altstadt undeme hervorragende z‘Mittag ide Calle de la Ronda schnappedsech die Vögel äne s‘Teleférico und gnüssed de Usblick über Quito und ufdi me oder weniger veschleierete Vulkän Antisana, Cotopaxi und Chimborazo.

Am Tag darauf isch dä de eint chli agschlage und mir chönd die schön Garage nomal füre Nacht phalte, de ander gaht nochli go dMitti vode Wält aluege. Cools Monumänt, aber anschienend 200m denäbed, bi ächte gahter dä äno vebi, top sach. Am nögschte Tag dä witer uf Papallacta chli go Bädele id Terme für di beide, finally. Isch etz chli en Runninggäg xi… vo deht us witer, wäg Räge nöd über Lumbaqui, sonder dä glich uf Ibarra füren unplante Stop vor de Gränze.

Ibarra schnäll zum Tanke und scho wärdemer umschwärmt, ja mir! Nöd die zwei Vögel. Nöd nur mir finded eus geil, au fasch all wo wüssed wasmer sind! 😎

Gad näbde Tanki isch de Töfflade vom Pablo. Nacheme Halbstündli pläuderle isch d‘Sach grizt: neui Zapatos gits, en nach 12‘000km sit Córdoba fällige Ölfilter und Ölwächsel und e chlises Upgrade… so nach de nächtliche Huarazgebirgserfahrig chömmer nöd wiederstah… 😍

Nachdems dä im Prozäss no witeri Sächeli wie kabutti Heizjaggekabel, butzti Lämpli und agrissni Sacoche entdecked wird dä ei Nacht zu zwei Nächt und am Dunschtig wärdemer no sec vode lokale Motoqueros ufes abendlichs Ibarra-Sightseeing und aschlüssens ufed I-Bare-Sightseeing usgfüehrt… herrlich. Dank letztderem gids dä no e dritti Nacht – die arme händ chlines Käterli… 🐯

Es ledschds Mal liebi Grüessli us Ecuador, isch de Wahnsinn xi, wänn ä s‘erschmal nöd Bombewätter – für‘s wichtigschte hämmer wie üblich Glöggli gha!

Cheers und nöd z‘sträng, yours sincerely, Lisi 😘